Mengenee mu ayoh...(Versi Klate)

17042006 (Isnin 3.08pm) - 17042012 (Selasa) : 6 TAHUN PEMERGIAN AYOH

Ayoh,
oghe teringat sgt ko ayoh male nieh. Takdih lps maghrib che Na msj royat suruh baco Yaasin ko ayoh. Oghe ingat doh n doh baca doh tadi. Harap2 ayoh doh terima Yaasin oghe.

Ayoh,
oghe tahu oghe bukee anok yg baik masa hayat ayoh, tp oghe berazam untuk jd anok yg baik slps ayoh xdop. Klu buleh oghe nk gapo hok oghe bt baik di dunia nie, jd saham ko ayoh di sana. Kalu buleh oghe nok mtk maaf kalu maso ayoh sakit mulo, oghe xbuat sebaik yg ayoh nok, oghe tahu ayoh xbyk komplen masa ayoh sakit dulu.

Ayoh,
Mitok maaf kalu masa makee ayah jadi lewat sbb oghe lambat bagi makee.
Mitok maaf kalu masa kacip kuku ayoh, oghe terkacip isi kulit n bdarah jari ayoh.
Mitok maaf kalu lambat tolong ayoh nok mandi, pahtue lambat tolong ayoh ambik air smaye utk smaye.
Mitok maaf kalu lambat tolong ayoh nok ballik bade maso ayoh lenguh duk atas lembek tepi dinding tue.

Ayoh,
oghe nok royat terimo kasih byk2
sbb jaga oghe yak kecik sapa besa..
sbb sokmo bawa g tame permaine maso kecik...
sbb sokmo bangun male maso oghe mintok air dahago...
sbb jaga maso oghe sakit...
sbb teme oghe g spita...
sbb saba denge peranga oghe...
sbb semuanya...

Ayoh,
terimo kasih sbb didikee ayoh dari kecik sapa besa
walaupung sokmo oghe komplen kalu ayoh xdae tengok buku2 oghe maso kecik
oghe komplen kalu kad kemajue tue ayoh dae sain saje n xdae tgk pung oghe dpt no berapo
loni oghe jadi cikgu, baru oghe tahu keje cikgu nie sibuk caro ko anok oghe dari anok sdiri...
oghe tahu ayoh nok anok2 ayoh berdikari sebenarnyo...

Ayoh,
semoga Allah balas kebaike ayoh dgn syurgaNya,
semoga xdop lagi kesakitee n penderitae mcm atas dunia dulu
Tene lah ayoh di sano...
Dale jagoae Allah.

Yaasin untuk ayoh. Amiin